2 Samuel 22

Rwĩmbo rwa Daudi rwa Kũgooca Ngai

1 ^aDaudi nĩainĩire Jehova na ciugo cia rwĩmbo rũrũ rĩrĩa Jehova aamũhonokirie kuuma guoko-inĩ gwa thũ ciake ciothe na kuuma guoko-inĩ gwa Saũlũ. 2Akiuga atĩrĩ:

“Jehova nĩwe rwaro rwakwa rwa ihiga, na nĩwe rũirigo rwakwa rwa hinya, na mũkũũri wakwa;
3 ^bNgai wakwa nĩwe rwaro rwakwa rwa ihiga, na nĩwe rĩũrĩro rĩakwa,
na ngo yakwa, na rũhĩa rwa ũhonokio wakwa.
Nĩwe kĩĩhitho gĩakwa kĩrũmu, na nĩwe rĩũrĩro rĩakwa, na mũhonokia wakwa;
nĩwe ũũhonokagia kuuma kũrĩ andũ arĩa mahũthagĩra hinya.
4 ^cNgayagĩra Jehova, ũrĩa wagĩrĩire kũgoocagwo,
na ngahonokio kuuma kũrĩ thũ ciakwa.

5 ^d“Ndiihũ cia gĩkuũ nĩciathiũrũrũkĩirie;
nakĩo kĩguũ kĩa mwanangĩko gĩkĩngĩria hinya.
6 ^eMĩhĩndo ya mbĩrĩra ĩgĩĩthiororokeria;
nayo mĩtego ya gĩkuũ ĩkĩĩhotorera.
7 ^fMĩnyamaro-inĩ yakwa ndakaĩire Jehova;
ngĩgĩkaĩra Ngai wakwa arĩ hekarũ-inĩ yake.
Nĩ aiguire mũgambo wakwa,
kĩrĩro gĩakwa gĩgĩkinya matũ-inĩ make.

8 ^g“Thĩ ĩkĩinaina na ĩgĩthingitha;
Nayo mĩthingi ya igũrũ ĩkĩenyenya;
ĩkĩinaina tondũ aarĩ mũrakaru.
9 ^hNdogo ĩkiuma maniũrũ-inĩ make ĩkĩambata na igũrũ;
mwaki wa kũniinana ũkiuma kanua-inĩ gake.
Kanua-inĩ gake hakoima makara mekũrĩrĩmbũka.
10 ⁱAahingũrire igũrũ agĩikũrũka thĩ;
matu matumanu maarĩ rungu rwa makinya make.
11 ^jOmbũkire akuuĩtwo nĩ ikerubi;
akĩambata na igũrũ na mathagu ma rũhuho.
12Ehumbĩrire na nduma,
agĩtua matu marĩa mairũ ma mbura ma kũu igũrũ hema yake ya kũmũthiũrũrũkĩria.
13Kuuma ũkengi ũrĩa warĩ harĩ we,
heni igĩakana mwaki.
14 ^kJehova akĩruruma arĩ kũu igũrũ;
mũgambo wa Ũrĩa-ũrĩ-Igũrũ-Mũno, ũkĩiguuo.
15Aikirie mĩguĩ, akĩharagania thũ,
agĩciikĩria rũheni, agĩcingatithia.
16 ^lHĩndĩ ĩyo mĩkuru ya iria ĩkĩonekana,
nayo mĩthingi ya thĩ ĩkĩhumbũrio,
nĩ ũndũ wa irũithia rĩa Jehova,
o na nĩ ũndũ wa ihurutana rĩa mĩhũmũ ya maniũrũ make.

17 ^m“Agĩtambũrũkia guoko gwake kuuma o kũu igũrũ akĩnyiita;
akĩnguucia akĩnduta maaĩ-inĩ kũrĩa kũriku.
18Andeithũrire thũ yakwa ĩrĩ hinya,
akĩndeithũra kũrĩ arĩa maathũire, o acio maangĩrĩtie hinya.
19 ⁿMaanjĩhotoreire mũthenya ũrĩa ndaarĩ na mũtino,
no Jehova nĩwe warĩ mũtiirĩrĩri wakwa.
20 ^oAndutire na nja akĩndwara handũ haariĩ,
akĩndeithũra tondũ nĩakenetio nĩ niĩ.

21 ^p“Jehova anjĩkĩire maũndũ kũringana na ũthingu wakwa,
akandĩha kũringana na ũtheru wa moko makwa.
22 ^qNĩgũkorwo nĩnũmĩtie njĩra cia Jehova;
ndiĩkĩte ũũru na ũndũ wa kũhutatĩra Ngai wakwa.
23 ^rMawatho make mothe marĩ mbere yakwa;
ndihutatĩire irĩra cia watho wake wa kũrũmĩrĩrwo.
24 ^sNgoretwo itarĩ na ũcuuke ndĩ mbere yake,
na ngemenyerera ndikehie.
25Jehova andĩhĩte kũringana na ũthingu wakwa,
akandĩha kũringana na ũtheru wakwa maitho-inĩ make.

26“Ũrĩ mwĩhokeku harĩ arĩa makwĩhokete,
na harĩ mũndũ ũrĩa ũtarĩ ũcuuke ũrĩĩonanagia ndũrĩ ũcuuke,
27 ^tkũrĩ ũrĩa wĩtheragia wĩonanagia ũrĩ mũtheru,
no harĩ ũrĩa ũrĩ mĩthiĩre mĩogomu ũgatuĩka njũhĩga.
28 ^uWee ũhonokagia andũ arĩa enyiihia,
no maitho maku monaga andũ arĩa etĩĩi nĩguo ũmaconorithie.
29Wee Jehova, nĩwe tawa wakwa,
Jehova atũmaga nduma yakwa ĩtuĩke ũtheri.
30Ndĩ na ũteithio waku no hote gũtharĩkĩra mbũtũ ya ita;
ndĩ na Ngai wakwa no hote kũrũga rũthingo.

31 ^v“Mũrungu-rĩ, njĩra ciake nĩnginyanĩru;
kiugo kĩa Jehova gĩtirĩ ihĩtia.
Nĩwe ngo ya arĩa othe mehithaga harĩ we.
32 ^wNĩ ũndũ-rĩ, nũũ Mũrungu tiga Jehova?
Na nũũ Rwaro rwa Ihiga tiga Ngai witũ?
33Nĩ Mũrungu ũũhotoraga hinya na ũhoti,
agatũma njĩra yakwa ĩkinyanĩre.
34Atũmaga magũrũ makwa matengʼere o ta ma thwariga;
aahotithagia kũrũgama kũndũ gũtũũgĩru.
35 ^xWe nĩwe wonagia moko makwa mũrũĩre wa mbaara;
moko makwa no mageete ũta wa gĩcango.
36Ũũheaga ngo yaku ya ũhootani;
ũinamagĩrĩra thĩ ũkaanenehia.
37 ^yŨnjaramagĩria njĩra ya kũrĩa thiiagĩra,
nĩgeetha magũrũ makwa matigatirũke.

38“Ndaingatithirie thũ ciakwa na ngĩcihehenja;
ndiacookire na thuutha nginya rĩrĩa cianiinirwo.
39 ^zNdacihehenjire biũ, ikĩremwo nĩ gũũkĩra,
ikĩgũa thĩ magũrũ-inĩ makwa.
40Wee ũũheaga hinya wa kũrũa mbaara,
ũgatũma thũ ciakwa ciinamĩrĩre magũrũ-inĩ makwa.
41 ^aaWatũmire thũ ciakwa ihũndũke ciũre,
na niĩ ngĩniina arĩa maathũire.
42Maakaire mateithio, no hatiarĩ na wa kũmahonokia,
magĩkaĩra Jehova no ndaametĩkire.
43 ^abNdaamahũũrire makĩhaana ta rũkũngũ rũhinyu rwa thĩ;
ngĩmahũũra na ngĩmarangĩrĩria ta ndooro ya njĩra-inĩ.

44 ^ac“Nĩũũhonoketie ngaaga gũtharĩkĩrwo nĩ andũ akwa;
ũndũũragia ndĩ mũtongoria wa ndũrĩrĩ.
Andũ itooĩ nĩmakandungatagĩra,
45andũ a kũngĩ mokaga kũrĩ niĩ menyiihĩtie;
maigua ngumo yakwa, makanjathĩkĩra.
46 ^adOthe makuuaga ngoro;
mokaga makĩinainaga moimĩte ciĩhitho-inĩ ciao cia hinya.

47 ^ae“Jehova atũũraga muoyo! O we Rwaro rwakwa rwa Ihiga arogoocwo!
Ngai arotũgĩrio, o we Rwaro rwakwa rwa Ihiga, na Mũhonokia wakwa!
48 ^afWe nĩwe Mũrungu ũrĩa ũndĩhagĩria,
aigaga ndũrĩrĩ rungu rwa watho wakwa,
49 ^agnĩwe ũũhonokagia kuuma kũrĩ thũ ciakwa.
Wanyambatĩririe igũrũ rĩa andũ arĩa maathũire,
ũkĩndeithũra harĩ andũ arĩa mahũthagĩra hinya.
50 ^ahNĩ ũndũ ũcio, Wee Jehova, nĩndĩkũgoocaga ndĩ gatagatĩ ka ndũrĩrĩ,
ndĩinaga ngagooca rĩĩtwa rĩaku.
51 ^aiAheaga mũthamaki wake ũhootani mũnene;
akonania ũtugi wake ũtathiraga kũrĩ ũcio wake mũitĩrĩrie maguta,
kũrĩ Daudi na njiaro ciake nginya tene.”